[東網巨星] 藝人蔡思貝、張振朗、王浩信及李佳芯，到西營盤為無綫新劇《踩過界》拍攝外景。被指向張振朗放電的思貝，與張振朗受訪時，故意全程擰歪面，她說：「費事一對望又話我電你！我哋戲入面關係似洪永城同黃翠如，所以好易被誤會友情係姣情。（有冇機會發展？）如果我同張振朗嘅話，我變男人！完全冇可能，其實電力同友善一線之差啫！」 張振朗即說：「蔡思貝咁講就好，為民除害！（話你幫佢吹沙？）唔係吹沙，係見佢眼有嘢，攞紙巾佢抹。（上次拍劇，見思貝用橙裝胸拍出水芙蓉，有咩感覺？）我成個腦都係橙同埋棚哨牙，不過個劇拍咗咁耐，都慣咗佢個哨牙樣。（冇哨牙即刻OK晒？）仲大鑊！有哨牙已經增添色彩。（緋聞女友陳芷尤有冇問你同思貝搞乜？）都冇，同思貝只係似兩兄弟喺度玩，正常人都知冇嘢。（芷尤放心晒？）好朋友都有信心。」
Search